هونه‌ری - كاوه‌یێ ئاسنگه‌ر وه‌كه‌ فلمه‌كێ كارتونی دهێته‌ به‌رهه‌م ئانین

ئیسماعیل تاهیر/ دهۆك – خورته‌كێ كورد و خورته‌كێ به‌ریتانی چیروكا "كاوه‌یێ ئاسنگه‌ر" وه‌كه‌ به‌رهه‌مه‌كێ فلمێ كارتونی به‌رهه‌م تینن. خورته‌كێ باژێرێ دهۆكێ ب ناڤێ هاڤی ئیبراهیم، پشتی ل كورسه‌كێ بێ كاران هه‌ڤنیاسینێ ل وه‌لاتێ به‌ریتانیا كه‌سه‌كێ به‌هره‌مه‌ندێ بریتانی بناڤێ ستورت پالمه‌ر دكه‌ت و پشتی ئێك ودوو ناس دكه‌ن دبینن كو ئاره‌زوویێن وان وه‌كهه‌ڤن و خه‌ونا وان ئه‌وه‌ ب شێوه‌یه‌كی ژ شێوه‌یان تشته‌كی ژ كه‌لتورێ كوردی بۆ جیهانێ بده‌نه‌ نیاسین. هاڤی ئیبراهیم و هه‌ڤالێ وی یێ به‌ریتانی ستورت پالمه‌ر پشتی تێكه‌لیێ بریارێ دده‌ن د گه‌ل هه‌ڤكاربن و چیرۆكا "كاوه‌یێ ئاسنگه‌ر" كو داستانه‌كا كوردی یا ناڤداره‌ و پشكه‌كا گرنگه‌ ژ كه‌لتورێ كوردی بكه‌نه‌ فلمه‌كێ كارتونی و ل سه‌ر سیسته‌مێ ((CGI كو سیسته‌مه‌كێ پێشكه‌ڤتی یه‌ و وێنه‌ ب دووراتی یێن سی یێ دهێته‌ دیتن. هاڤی ئیبراهیم ل دور پرۆژێ خوه‌ ئاماژه‌ دا "بۆ ڤێ هزرێ مه‌ په‌یوه‌ندی ب سه‌نته‌رێ (Goodwin Development Trust) كر و وان ب ئه‌رێنی هزرا مه‌ وه‌رگرت و پشته‌ڤانیا دراڤی بۆ پرۆژه‌یێ مه‌ دیاركر و دناڤ سه‌نته‌ری دا ئه‌م حه‌واندین و پشتی چیرۆك ب زمانێ كوردی هاتیه‌ به‌رهه‌ڤكرن مه‌ په‌یوه‌ندی ب نڤیسه‌رو رۆژنامه‌ڤان بلند محه‌مه‌د كر ژ بۆ پێداچون و دوباره‌ دارشتنا چیرۆكێ و وی ژی ب خه‌مخوری ئه‌ڤ كاره‌ ئه‌نجامدا، نوكه‌ ژی كار یێ د قوناغێن دووماهیێ دا و دشیاندایه‌ پشكه‌كا مه‌زن ژێ بهێته‌ نیشادان". ل دور چاوانیا به‌لاڤكرنا فلمی ژی هاڤی دبێژیت "ده‌مێ فیلمی (55) خوله‌كن و مه‌ ل به‌ره‌ ل هه‌می ده‌ڤه‌رێن كوردنشین ل ئه‌روپا و ئه‌مریكا و كوردستانا مه‌زن به‌لاڤبكه‌ین و ب هه‌ردوو زمانێن ئینگلیزی و كوردی دێ هێته‌ به‌لاڤكرن، مه‌ په‌یوه‌ندی ب گه‌له‌ك كوردێن ئه‌وروپا كر یێن ده‌ست د بیاڤێ هونه‌ری دا هه‌ی و خودان بسپور دبیاڤێ چێكرنا فلمان دا هه‌روسا بۆ دانه‌یا ئینگلیزی ژی هنه‌ك كه‌سێن دڤی بیاڤی دا كار كری ل گازیا مه‌ هاتن و ده‌نگێ مه‌ تومار كرن، بزاڤێن مه‌ دبه‌رده‌وامن ژ بۆ دیتنا كومپانیایه‌كێ كو فیلمی بكریت و به‌لاڤبكه‌ت و مه‌ دڤێت ل كوردستانێ بیت". بۆ پتر پێزانین و نیاسینا وان ئه‌كته‌ران یێن دڤی فیلمی دا كار كرین دشیاندایه‌ سه‌ره‌دانا ڤی سایتی بهێته‌ كرن كو تایبه‌ته‌ ب چێكرنا فیلمێ كارتونی یێ كاوه‌یێ ئاسنگه‌ر. www.splash-animations.com هه‌ژی گۆتنێ یه‌ كو هاڤی ئیبراهیم ده‌رچویێ په‌یمانگه‌ها هونه‌رێن جوانه‌ ل دهوكێ پشكا شێوه‌كاریا په‌یكه‌ری وپشكداری ددانان و چێكرنا هن په‌یكه‌ران دا كریه‌ وه‌كو په‌یكه‌رێ دای شرین ل دهوكێ و نهو ژی قوتابی یه‌ ل زانینگه‌ها لینكولن یا هونه‌رێن جوان ل به‌ریتانیا.